Ֆարինգիտ. արդեն ձմեռ է. Սալուտեմ ամսագիր №4

Արդեն ձմեռ է, իսկ տարվա այս եղանակին, սովորաբար, գլուխ են բարձրացնում վերին շնչառական ուղիների վարակները։ Վարակի մուտքի դռներ են բերանը և վերին շնչուղիները։ Վարակը վերին շնչառական ուղիներով ներթափանցում է լորձաթաղանթի մեջ՝ նպաստելով բորբոքային գործընթացի առաջացմանը:

Վարակի հանդեպ առավել զգայուն է ըմպանի լորձաթաղանթը։ Ըմպանաբորբը կամ ֆարինգիտը (լատիներեն` Pharyngitis acuta) ըմպանի լորձաթաղանթի սուր կամ քրոնիկ բորբոքումն է։ Բորբոքային գործընթացի հիմքում հիմնականում վիրուսային ծագման վարակներն են (գրիպի վիրուսը, Covid-19 և այլն), ոչ հաճախ` A խմբի ստրեպտոկոկերը։ Սուր ֆարինգիտը տևում է 7-10 օր: Կլինիկորեն այն դրսևորվում է ըմպանի լորձաթաղանթի կարմրածությամբ, այտուցվածությամբ, հազով, կոկորդի չորությամբ, կլման ակտի դժվարացմամբ, կլման ժամանակ` ցավի, քերոցի, այրոցի զգացողությամբ։ Կարող են դիտվել նաև մարմնի ջերմաստիճանի բարձրացում, ընդհանուր թուլություն, մկանահոդացավեր։

Ախտորոշումը կատարվում է պացիենտի անամնեստիկ տվյալների և օբյեկտիվ զննման տվյալների հիման վրա։

Ճիշտ բուժման շնորհիվ հնարավոր է կանխարգելել սուր ֆարինգիտի հետագա վերափոխումը քրոնիկ ձևի։

Անհրաժեշտ է սենյակի օդը խոնավացնել, առատորեն խմել սենյակային ջերմաստիճանի հեղուկ, ինչպես նաև կիրառել հակաբորբոքային, հակասեպտիկ ցողացիրներ, ցավազրկող և ջերմիջեցնող դեղորայք:

Սննդակարգում հարկ է ներառել բարձր կալորիականության սնունդ, խուսափել լորձաթաղանթը գրգռող կծու, թթու, քաղցր սննդատեսակներից, բացառել վնասակար սովորությունները՝ ծխելը, ալկոհոլի օգտագործումը և այլն։

Էմիլիա Մելոյան,
քիթ-կոկորդ-ականջաբան CMS yerevan
Դավիթ Անհաղթի 13/4,
+374 94 88 09 85
instagram.com/dr.meloyan- facebook.com/drmeloyan/

«ՍԱԼՈՒՏԵՄ» առողջ ապրելակերպի ամսագիր
Պետական գրանցման համար․ 211․200․00969
[email protected]
+(374) 91 64 10 15
+(374) 98 79 15 15

Հարցեր, պատասխաններ, մեկնաբանություններ